News : Construction Industry Development Authority

ඉදිකිරීම් කර්මාන්ත සංවර්ධන පණත බලාත්ම කිරීම

02 02 2023 - 15:30 PM

කොවිඩ් සහ ආර්ථික අර්බුදය හේතුවෙන් පීඩාවට පත් ඉදිකිරීම් ක්ෂේත්‍රයේ නියුතු වුවන්ට සහන සැලසීම සඳහා ඉදිකිරීම් කර්මාන්ත සංවර්ධන පණත බලාත්මක කෙරේ.

ඉදිකිරීම් කර්මාන්ත සංවර්ධන පනත බලාත්මක කෙරේ. කොවිඩ් සහ ආර්ථික අර්බුදය හේතුවෙන් පීඩාවට පත් ඉදිකිරීම් ක්ෂේත්‍රයේ නියුතු වුවන්ට සහන සැලසීම අරමුණයි.

මේ සඳහා අවශ්‍ය පියවර කඩිනමින් ගන්නා ලෙස ඇමති ප්‍රසන්න රණතුංග මහතා පසුගියදා (02) අමාත්‍යාංශයේ පැවැති සාකච්ඡාවකදී බලධාරීන්ට උපදෙස් දුන්නේය. සාකච්ඡාව පැවැත්වුණේ ශ්‍රී ලංකා ජාතික ඉදිකිරීම් සංගමයේ නියෝජිතයන් සමඟයි.

2014 අංක 33 දරණ ඉදිකිරීම් කර්මාන්ත සංවර්ධන පනතෙහි ප්‍රතිපාදන යටතේ ඉදිකිරීම් අභ්‍යාස සංවර්ධන ආයතනය, ඉදිකිරීම් කර්මාන්ත සංවර්ධන අධිකාරිය බවට පරිවර්තනය කර ඇත. ඉදිකිරීම් කර්මාන්තයේ කටයුතු නියාමනය කිරීම, ලියාපදිංචි කිරීම, විධිමත් කිරීම හා ප්‍රමිතිකරණය කිරීම මෙම පනතෙහි ප්‍රධාන අරමුණ වේ.

ඇමතිවරයා මෙහිදී අවධාරණය කළේ ඉදිකිරීම් ක්ෂේත්‍රයේ නියුතු ලක්ෂ 13 ක පිරිස රැක ගැනීම සඳහා රජය වගකීමෙන් කටයුතු කරන බවයි.

අදියර කීපයක් යටතේ ඉදිකිරීම් ක්ෂේත්‍ර යේ නියුතු වූවන්ට ගෙවිය යුතු හිඟ මුදල් ගෙවා දැමීමට පියවර ගනිමින් සිටින බව ද ඇමතිවරයා මෙහිදී පෙන්වා දුන්නේය. ඉදිකිරීම් සංවර්ධන පණත බලාත්මක කිරීම තුළින් ක්ෂේත්‍ර යේ නියුතු වූවන්ට නෛතික පිළිගැනීමක් ලැබෙන බව පෙන්වා දුන් ඇමතිවරයා පසුගිය (27) වෙනිදා මීට අදාළ චක්‍ර ලේඛයක් මෙරට සියලුම රජයේ අමාත්‍යාංශ සහ පළාත් සභා වෙත නාගරික සංවර්ධන හා නිවාස අමාත්‍යාංශ ලේකම්වරයාගේ අත්සනින් යොමු කර ඇතැයි ද කීවේය.

ඉදිකිරීම් කර්මාන්ත සංවර්ධන අධිකාරිය මේ වනවිට ඉදිකිරීම් ක්ෂේත්‍රයේ ශීල්පීන් 20,000 ක් සඳහා බලපත්‍ර ලබා දීම ආරම්භ කර තිබේ. ඔවුන්ගේ ආරවුල් විසදීමේ ක්‍රියාවලියේ කාර්යක්ෂමතාවය වැඩිදියුණු කිරීමට ද පියවර ගැණින. මෙරට ලක්ෂ 13 කට ආසන්න පිරිසක් ඉදිකිරීම් ක්ෂේත්‍රයේ නිරතව සිටිති. ඔවුන්ගෙන් යැපෙන්නන්ගේ සංඛ්‍යාව ලක්ෂ 30 ඉක්මවයි. ඉදිරි වසරක කාලය තුළ ඉදිකිරීම් ක්ෂේත්‍ර යේ නියුතු වූවන් රැක බලා ගැනීමට හැකිවුවහොත් ඔවුන්ගේ අනාගතය සුරක්ෂිත විය හැකි යැයි විශ්වාසය පළ කළ ඇමති ප්‍රසන්න රණතුංග මහතා ලබන වසර වනවිට මෙරට ඉදිකිරීම් ක්ෂේත්‍රය යථා තත්ත්වයට පත්වනු ඇති බවට ද විශ්වාසය පළ කළේය.

මෙහිදී අදහස් දැක්වූ නාගරික සංවර්ධන හා නිවාස අමාත්‍යංශයේ ලේකම් ඩබ්ලිව්.එස්. සත්‍යානන්ද මහතා අවධාරණය කළේ ඉදිකිරීම් ක්ෂේත්‍රය මේ වන විට කඩා වැටීමකට ලක්ව තිබෙන බවයි. කොවිඩ් වසංගතය හා ආර්ථික අර්බුදය ඊට හේතුවයි. ඉදිකිරීම් ක්ෂේත්‍රය සම්බන්ධයෙන් සෘජුව වග කියන අමාත්‍යාංශයක් ලෙස එම ක්ෂේත්‍රය යළි නගා සිටුවීමේ වගකීම නාගරික සංවර්ධන හා නිවාස අමාත්‍යාංශය විසින් භාරගෙන ඇතැයි ද ලේකම්වරයා මෙහිදී වැඩිදුරටත් සඳහන් කළේය.
මෙම අවස්ථාවට ඉදිකිරීම් කර්මාන්ත සංවර්ධන අධිකාරියේ නව සභාපති ඉංජිනේරු ආර්.එච්. රිවිනිස් මහතා, ජාතික ඉදිකිරීම් සංගමයේ උප සභාපති එම්.ඩී. පෝල් මහතා ඇතුළු නිලධාරින් පිරිසක් එක්ව සිටියහ.