ඉදිකිරීම් වැඩබිම් ආශ්‍රිතව පැතිර යන ඩෙංගු මදුරු ව්‍යාප්තිය,මත්ද්‍රව්‍ය ව්‍යාප්තිය හා නොයෙකුත් වසංගත තත්ත්වයන් පාලනය කිරීමට ජාතික වැඩ පිළිවෙලක් ක්‍රියාත්මක් කෙරේ.
නාගරික සංවර්ධන හා නිවාස අමාත්‍ය ප්‍රසන්න රණතුංග මහතා පසුගියදා නිළධාරීන්ට උපදෙස් දුන්නේ ඉදිකිරීම් වැඩබිම්වල සේවයේ නියුතුවූවන් මත්ද්‍රව්‍යය භාවිතයෙන් හා සමාජ විරෝධී ක්‍රියාවලින් මුදවා ගැනීමේ වැඩපිළිවෙළ ක්‍රියාත්මක කිරීමට මත්ද්‍රව්‍ය නිවාරණ කාර්යංශය සහ අනෙකුත් රාජ්‍ය හා පුද්ගලික ආයතන සහභාගී කරවා ගන්නා ලෙසයි.
එම වැඩ පිළිවෙල පළමුවෙන් බස්නාහිර පළාතේ ඉදිකිරීම් වැඩ බිම් ආශ්‍රයෙන් ආරම්භ කරන ලෙසද අමාත්‍යවරයා නිළධාරීන්ට උපදෙස් දුන්නේය.
ඉදිකිරීම් වැඩබිම් ආශ්‍රිතව ඩෙංගු මදුරු වසංගතය, මත්ද්‍රව්‍ය උවදුර සහ නොයෙකුත් විෂමාචාර ක්‍රියා පැතිර යෑම නිසාවෙන් කොන්ත්‍රාත් සමාගම්වලට මෙන්ම සමාජයටද හානියක් සිදුවන බවද අමාත්‍යවරයා පෙන්වා දුන්නේය.
මෙහිදී අදහස් දැක්වූ ඉදිකිරීම් කර්මාන්ත සංවර්ධන අධිකාරියේ අධ්‍යක්ෂ (සංවර්ධන) එස්. අමරසේකර මහතා සඳහන් කළේ මේ වනවිටත් සෑම මසකටම වරක් ඉදිකිරීම් වැඩබිම් ආශ්‍රිතව ඩෙංගු මදුරු ව්‍යාප්තිය සම්බන්ධයෙන් වාර්තාවක් ලබාගන්නා බවයි. ඒ අනුව ඩෙංගු මදුරු ව්‍යාප්තිය පාලනය කිරීමට අවශ්‍ය පියවර ගන්නා බවද ඔහු වැඩිදුරටත් කීවේය.
එමෙන්ම ඩෙංගු මදුරු ව්‍යාප්තිය පාලනය කිරීමේ අරමුණින් සෞඛ්‍ය අමාත්‍යංශයේ හා ජාතික ඩෙංගු මර්දන ඒකකයේ උපදෙස් මත ඉදිකිරීම් වැඩබිම්වලට අනුවර්තනය වීම සඳහා පසුගිය කාලයේදී මාර්ගෝපදේශ හතරක් නිකුත් කර තිබෙන බවද හෙතෙම වැඩිදුරටත් පවසයි.
අමාත්‍ය ප්‍රසන්න රණතුංග මහතා සඳහන් කළේ කොරෝනා වයිරස ව්‍යප්තිය හේතුවෙන් බිඳවැටී තිබූ මෙරට ඉදිකිරීම් කේෂ්ත්‍රය මේ වනවිට යම් ප්‍රගතියක් පෙන්නුම් කරමින් සිටින බවයි. එබැවින් ඉදිකිරීම් වැඩබිම් ආශ්‍රිතව වසංගත උවදුරු පැතිර ගියහොත් එය ඉදිකිරීම් කේෂ්ත්‍රයේ ඉදිරි ප්‍රගමනයට බාධාවක් බවද අමාත්‍යවරයා පෙන්වා දුන්නේය.
මෙම තත්ත්වයන් සම්බන්ධයෙන් ඉදිකිරීම් ප්‍රජාව දැනුවත් කර වසංගත හා විෂමාචාරී තත්ත්වයන් වළක්වා ගැනීම කාලීන අවශ්‍යතාවයක් බවද අමාත්‍ය ප්‍රසන්න රණතුංග මහතා වැඩිදුරටත් අවධාරණය කළේය.
ඉදිකිරීම් වැඩබිම්...
09 02 2023 - 12:30 PM
CIDA නව සභාපතිවරයා...
03 02 2023 - 16:00 PM
ඉදිකිරීම්...
02 02 2023 - 15:30 PM
CITY NEWS - February...
01 02 2023 - 10:30 AM
